27 dekabrda Xocalı rayon Kosalar kənd tam orta məktəbinin idman zalında Xocalı rayon Gənclər və İdman İdarəsinin və "Xocalının səsi" qəzetinin birgə təşkilatçılığı ilə "Xocalının səsi" qəzetinin 300-cü buraxılışı münasibətilə və "Biz zərərli vərdişləri yox, idmanı seçirik" devizi altında Xocalı rayon məktəbliləri arasında voleybol yarışı keçirildi. Yarışda Kəlbəcər rayon 99 saylı tam orta məktəbin şagirdlərindən ibarət yığma komanda da iştirak etdi.

        Yarışdan əvvəl Xocalı rayon Gənclər və İdman İdarəsinin rəisi Elməddin Bağırov və baş məsləhətçi Ramiz Alıyev çıxış edərək narkomaniyanın və digər zərərli vərdişlərin insan həyatına mənfi təsirindən danışdılar. Zərərli vərdişlərdən gəncləri çəkindirmək üçün və bu bəlanın fəsadları haqqında ətraflı məlumatlar verdilər. "Xocalının səsi" qəzetinin redaktoru Qalib Bəyməmmədoğlu qəzetin yaranma tarixindən və fəaliyyətindən söz açdı. Xocalı rayonunun yeganə mətbuat orqanının səhifələrində Xocalı soyqırımı, erməni vəhşilikləri haqqında mütəmadi yazılar verildiyini vurğuladı. 

         Yarışın nəticəsinə əsasən, I yerə Xocalı rayon Kosalar kənd tam orta məktəbinin komandası, II yerə Xocalı rayon Yaloba kənd tam orta məktəbinin komandası, III yerə isə Xocalı rayon Əli Kərim adına Başkənd kənd tam orta məktəbinin komandası sahib oldu.